Moskvada silahlı hücuma məruz qalan Rusiya Miqrantlar Federasiyasının rəhbərlərindən biri olan azərbaycanlı Mais Qurbanovun hadisə baş verən anda təhlükəsizlik kameraları ilə qeydə alınan videosu yayılıb. ANS-in "Lifenews"a istinadla verdiyi məlumata görə, heç nədən şübhələnməyən M.Qurbanov Novokosino rayonundakı evinin girişinə yaxınlaşır.

 

Bu zaman iti addımlarla onun arxasına slavyan görünüşlü qız gəlir. Qız dayanmadan əlini qaldırır və silahla atəş açır. Daha sonra o yoluna davam edir.

Yaralı Qurbanov isə nə baş verdiyini anlamadan geri baxaraq əks tərəfə doğru qaçmağa başlayır. Hadisənin şokunda olan federasiya rəhbəri heç əlindəki ərzaq sellofanınıda yerə atmayıb.

Rusiya Miqrantlar Federasiyasının vitse-prezidenti Mais Qurbanov ifadəsində arxasından yaxınlaşan qızın səssiz olduğunu, heç bir hə də səsləndirmədiyini deyib. Yaralanan kişi yaxınlıqdakı kafeyə kimi gedərək kömək istəyib.

Mais Qurbanov da Rusiya Miqrantlar Federasiyasının başçısı Məhəmməd Əmin kimi hücumun fəaliyyəti ilə bağlı olduğunu düşünür. "Bizim ünvanımıza müntəzəm olaraq hədə qorxu zəngləri gəlir. Amma konkret mənə xəbərdarlıq gəlməmişdi. İki il öncə mənim oğluma qarşı da hücum törədilmişdi. Amma o zaman bizə cinayət işi açmaqdan imtina edilmişdi".

Xəstəxanada açıqlama verən M.Qurbanov ona hücum edənlərin 4 nəfərdən ibarət olduğunu deyib. Onun sözlərinə görə, onlar orta yaşlı iki qız və iki oğlan olub. Silahla atəş açan isə qızlardan biri olub.